Мексиканските археолози од Националниот институт за антропологија и историја денеска соопштија дека нашле пештера во светилиштето на Маите Чичен Ица во која откриле околу 200 керамички садови во речиси недопрена состојба.
Како што наведоа, садовите датираат од период пред околу 1.000 години и содржат делови од коски и материјали обработувани со горење. Сите предмети се дадени на анализа.
Археологот Гилјермо де Анда рече дека истражувањето на пештерата почнало минатата година, откако локални жители ги известиле за нејзиното постоење, а се покажало дека знаеле за неа веќе 50 години и не кажувале, најверојатно за да ја заштитат.
Околу 155 керамички садови имале слика на богот на дождот Тлалока кој се слави во централно Мексико.
Се наведува дека Маите имале свој бог на дождот Чака и дека најверојатно го прифатиле богот Тлалока пред хиспанските народи.
Де Анда истакна дека древните Маи сигурно ползеле за да влезат во исклучително тесниот и низок влез на пештерата, пред да стигнат до повисоките делови од пештерата каде ги приложувале даровите за богот за да побараат дожд.
И истражувачите влегувале во пештерата ползејќи, со оглед на тоа дека влезот е висок само 40 сантиметри.
Пештерата Баламка се наоѓа на околу 2,75 километри источно од главната пирамида Кукулкан, позната како Ил Кастилјо (Дворец).
Според Де Анда, тој и неговиот тим правеле истражувања за утврдување на рутите и местата на кои бил поставен подземниот систем за вода на Маите, бидејќи се смета дека под храмовите и пирамидите има бројни неоткриени мали езера.
