Здружението на граѓани Центар за одржливи иницијативи цели кон одржлив развој на заедницата или „Одржливи иницијативи“ на 2 октомври (сабота) ќе прави промоција на самоводечката, велосипедска прошетка по не толку познатите музеи и културни локалитети во Скопје.
Секој учесник ќе има можност со помош на мапа, напатствија за движење, и описи за локалитетите и музеите да посети и открива места за кои не секој знае каде се или што се.
Организаторите најавуваат две рути:
1. Низ централното градско подрачје, во должина од околу 5 км, во која ќе се посетат: Меморијалниот музеј на илегалните работилници за изработување на оружјеза време на НОВ 1941-1944 во Скопје; Куќата на Лазар Личеновски (од надвор); Музејот на МНТ; Музејот на старата скопска чаршија; и гранатата. За оваа рута доволен ви е обичен, било каков велосипед со катанец за заклучување. Рутата е претежно по велосипедски патеки, но има и мал дел каде се вози по нефреквентни улици.
2. Низ периферијата на Скопје, во должина од околу 35 км, во која ќе се посетат: Скупи, Римскиот аквадукт, Дендро паркот и Ботаничката градина. За оваа рута потребен ви е добар точак, пожелно да е планински точак бидејќи има делови каде се вози по земја. Рутата е претежно по велосипедски патишта, но има делови каде се вози по улица, а и точки каде се преминуваат прометни улици.
Двете рути се со строго ограничен број на учесници, заради ограничениот капацитет на музеите, но и заради практикување анти-корона мерки.
На промотивната прошетка покрај употребата на напатствијата ќе биде присутен и туристички водич на велосипед, односно редар.
Учесниците потребно е да:
- имаат исправен велосипед со катанец за заклучување;
- да имаат потврда за вакцина, или потврда за неодамна прележан COVID-19, или потврда од тест дека немаат COVID-19;
- да имаат со себе маска или марама за покривање на устата и носот при влез во објектите;
- да ја инсталираат апликацијата izi.travel;
- да понесат лично шише со вода за пиење;
- поради времетраењето, може да понесат и лична ужинка.
Се молат сите заинтересирани да се пријават со праќање на порака преку Facebook страницата на „Одржливи иницијативи“ или на contact@inicijativi.org.mk
Принципот е прв-пријавен, прв-услужен. Локацијата на чекање за почетокот на турата како и напатствијата за турата ќе бидат испратени само на учесниците.
Тие кои што не можат да присуствуваат оваа сабота на настанот ќе може да ги посетат музеите и локалитетите индивидуално со употреба на напатствијата и апликацијата. Апликацијата и напатствијата ќе бидат достапни и бесплатни за јавноста по овој настан.
Овој настан е можност учесниците да ги посетат музеите кои вообичаено не се отворени за викенд.
Настанот се организира во согласнот важечките анти-корона мерки и протоколи. Се молат сите потврдени учесници да го известат организаторот во случај на појава на симптоми на болест.
Проектот Скриените музеи на Скопје е спроведуван со поддршка од Музеј на Град Скопје, а финансиски е поддржан од Министерство за култура и Град Скопје.
