Кризата предизвикана од пандемијата со коронавирусот претставува најголема закана за менталното здравје по Втората светска војна, предупреди главниот британски психијатар.
Д-р Адријан Џејмс, претседател на Кралскиот колеџ на психијатари во Велика Британија, изјави дека комбинацијата на болеста COVID-19, нејзините социјални последици и економскиот пад има длабок ефект на менталното здравје на луѓето, кое ќе остане нарушено долго време и по пандемијата.
Се смета дека дури на 10 милиони луѓе, вклучувајќи и 1.5 милиони деца, им е потребна поддршка во зачувувањето на менталното здравје како директна последица од пандемиската криза, покажуваат податоците од британскиот Центар за ментално здравје.
„Ова е веројатно најголемиот удар на менталното здравје од Втората светска војна. Ќе мора да најдеме начини да се соочиме со долгорочните последици“, изјави Џејмс за Guardian.
Моделирањето на британскиот Центар за ментално здравје предвидува дека на околу 1,3 милиони луѓе, кои претходно немале проблеми со менталното здравје, ќе им биде потребно лекување од умерена до тешка анксиозност, додека 1,8 милиони луѓе ќе мора да се лекуваат од умерена до тешка депресија.