Лош рестарт на сезоната во италијанската лига за двајцата наши фудбалери кои синоќа беа немоќни да им помогнат на своите тимови.
Горан Пандев со Џеноа ја пречека Парма, но и покрај големиот оптимизам неговиот тим на крајот замина високо поразен од сопствениот стадион. Пандев се најде во почетниот состав и немаше забележителен настап, како и целиот негов тим.
Веројатно клучен момент беше кога неговиот соиграч Доменико Кришито не реализираше пенал во 29. минута со кој можеше да израмни на 1:1. Парма потоа направи недостижна предност од 0:3, а при тој резултат во 58. минута Пандев беше дел од двојната измена кога на негово место влезе Андреа Пинамонти. На крајот Парма славеше со 1:4.
Во истовреме во Торино гостуваше Илија Несторовски со Удинезе. И тој се најде во стартниот состав и играше до 55. минута кога беше заменет со Кевин Лазања. Удинезе губеше со 1:0 уште од 16. минута, а тој резултат на крајот се покажа и како конечен.
Победа синоќа прослави Елиф Елмас чиј Наполи со 0:2 победи на тешкото гостување кај Верона. Но, македонбскиот бисер преседа 90 минути на гостинската клупа не добивајќи минутажа.
Од другата страна на Медитеранот, во Шпанија, Енис Барди ја имаше истата судбина како Пандев и Несторовски: пораз и замена. Барди играше до 83. минута кога Ернани влезе наместо него, а Леванте претрпе домашен пораз од мадридски Атлетико и тоа со автогол уште во 15. минута.
