Принцезата Шарлин од Монако ги изненади сите со новата фризура кога се појави на божикна забава со децата од кнежевството Монако.
За време на божикното делење подароци за децата, сопругата на принцот Алберт покажа прилично драматична промена на фризурата.
Наместо нејзината вообичаена уредна боб фризура, 42-годишната припадничка на династијата ја покажа новата „андеркат“ фризура – со избричена едната страна и задниот дел од главата над вратот.
Новиот изглед го заокружи со заштитна маска што стилски одговараше на нејзината модна комбинација.
Претходно во текот на денот Шарлин носеше беретка, но видно беше дека има избричено дел од главата.
Грациозната принцеза, која многумина ја споредуваат со принцезите Дијана и Грејс Кели, е позната по нејзиниот елегантен стил, па ваквиот потег за многумина беше изненадување, а за некои и шок. Иако правилата за стајлингот на кралското семејство во Монако не се толку строги како оние за британското кралско семејство, ваквата фризура сепак е необична.
Шарлин покажа дека елеганцијата, шармот и достоинственото однесување немаат врска со „класичната убавина“, а ќе се согласиме со многу корисници на социјалните мрежи дека многу ни се допаѓа оваа „панк принцеза“.
Шарлин и принцот Алберт (59) имаат две деца, близнаците Габриел и Жак, кои се родени во 2014 година.
