Додека одговараше на новинарски прашања на летот назад во Италија од Грција, папата Франциск изјави дека „гревовите на телото не се најсериозни“. Наместо тоа, поглаварот на Католичката црква рече дека гордоста и омразата се „најголеми“ гревови.
Папата исто така беше прашан за оставката на парискиот надбискуп Мишел Опети кој понуди да се повлече од позицијата откако претходно во медиумите беше објавено дека бил во интимна врска со жена.
Традиционално, надбискупите и повисоките членови на Католичката црква го почитуваат клерикалниот целибат што значи дека се воздржуваат од секс.
Папата, кој ја прифати оставката на надбискупот, изјави дека тоа било пропуст од негова страна, но не целосен пропуст против шестата заповед. Шестата заповед вели „Не врши прељуба“.
Тој објасни дека надбискупот е отстранет од позицијата поради „озборувањата“ за него кои довеле до тоа да не може повеќе да управува со епархијата. Вели дека сите луѓе се грешници, вклучително и самиот тој.
„Кога озборувањата растат и растат, ја одземаат репутацијата на човекот, тој човек повеќе не може да биде одговорен за работата и тоа е неправда. Затоа ја прифатив оставката на Опетит, не на олтарот на вистината туку на олтарот на лицемерието“, објасни Папата.