Стратегот на Манчестер Сити, Пеп Гуардиола, е првиот тренер меѓу своите колеги од 12-те клубови основачи на Супер лигата кој отвореното го критикуваше новото натпреварување.
Пеп рече дека предложениот концепт на Супер лигата во која 15 екипи ќе имаат загарантирано место без оглед на постигнатите резултати се коси со темелните постулати на спортот.
„Спортот не е спорт кога не постои врска меѓу вложениот труд и наградата. Кога успехот ви е загарантиран, тоа не е спорт, кога не е важно дали сте победиле или загубиле, тоа не е спорт“, изјави Жузеп Гуардиола.
„Не е правично некој клуб да се бори за да стигне до врвот и тогаш да дознае дека не може да се квалификува во елитата, бидејќи таа е веќе загарантирана за некој друг“, додаде каталонскиот стратег, внимателно, притоа, бирајќи ги зборовите за да не го навреди својот клуб.
Манчестер Сити заедно со уште пет англиски клубови и тоа Манчестер Јунајтед, Арсенал, Челси, Тотенхем и Ливерпул, е меѓу 12-те потписници на новата Супер лига од затворен тип.
