Симпатичниот смрдливко нема да го гледаме во вториот дел од анимираниот филм „Space Jam“ откако неговите сцени биле избришани, тврди Deadline.
Романтичарот и нарцис, Пепе Ле Пју, симпатичниот американски твор кој вечно трага по својата сродна душа, нема да биде дел од „Space Jam“ чие продолжение доаѓа 25 години по оригиналот.
Пепе, несвесен за неговата одбивна смрдеа, упорно трага по љубов од понежниот пол, но неговите романтични обиди секогаш завршуваат со невозвратена љубов. Поради тоа, колумнистот Чарлс Блоу од The New York Times го обвини цртаниот лик дека „ги учи момчињата дека 'не' не значи навистина не“ и дека игнорирајќи го физичкото одбивање од страна на понежниот пол е „нормално, слатко и смешно“.
Deadline во неделата објави дека сцената во која се појавува Пепе веќе е исфрлена од продолжението на „Space Jam“ кое го прави Warner Bros. Онлајн магазинот тврди дека Пепе не е исфрлен поради колумната во The New York Times.
Снимена во 2019, сцената ја вклучуваше актерката Џејн Санто заедно со Пепе Ле Пју и беше опишана како црно-бел потсетник на „Casablanca“. Пепе се обидува да го бакне ликот игран од Санто, која истура пијалак врз него и му удира шлаканица. Леброн Џејмс во тој момент влегува во барот заедно со Душко Долгоушко и ја бараат Лола. Пепе им открива дека мачката Пенелопи, неговата долга невозвратена љубов, побарала забрана за негово доближување, па Леброн му вели дека „не можеш да допираш други од Веселата дружина без нивна согласност“.
Санто била разочарана од повлекувањето на сцената бидејќи во неа Пепе добива лекција во однос на тоа како не смее да се однесува. Таа се разочарала што „младите девојќи и момци нема да имаат шанса да увидат дека однесувањето на Пепе е неприфатливо“.
„Space Jam: A New Legacy“, или познат и едноставно како „Space Jam 2“ треба да ја има премиерата на 16 јули годинава на HBO Max. Режисер е Малколм Д. Ли кој го замени Теренс Ненс кој режираше кога беше ставена сцената.