Роденденот не го славите вие, туку вашето дете, секогаш имајте го тоа на ум.
Понесени од големата желба да им приредат на нивните деца незаборавен роденден, многу родители честопати се ставаат себе си во фокус на настанот и така ненамерно им ја уништуваат веселбата на децата.
Можеби мислите дека вашите деца брзо ќе го заборават фијаското кога мама се дерела на дечкото од достава на пица или на девојката која требало да ја донесе тортата, а и самите сигурно памтите некоја неславна родендеска забава, па знаете дека тие инциденти не се забораваат.
За да се осигурате дека вашето дете ќе има роденденска забава од соништата, следете ги овие пет златни правила:
Без нервози
Децата се под најголем стрес кога нивните родители се нервозни или лути, па на денот на прославата по секоја цена потрудете се да бидете добри и да одбегнувате расправии.
Не е ваш роденден
Запамтете дека вашето дете е славеникот и во рамките на вашите можности направете му роденден каков што сака.
Дајте им на децата храна за деца
Пред забавата прво распрашајте се дали некое од децата има некакви алергии на храна. Второ, ова не е време да експериментирате, ниту да им наметнувате некаков животен стил на децата. Изберете грицки и закуски што се претежно омилени кај децата и само внимавајте да не претераат со благо.
Вклучете го детето во подготовките
Претворете го роденденот на вашето дете во забавен ден што ќе може да го поминете сите заедно. Дајте му да направи едноставни украси, да ги нареди салфетите на маса, да ја одбере темата и бојата за украсите и слично. На тој начин ќе се чувствува и корисно и одговорно.
Секогаш имајте план Б
Децата си се деца и секогаш има веројатност некоја од занимливите активности што сте ги планирале да им стане досадна. Затоа е добро да имате план Б, па дури и В и Г. Осмислете доволно забавни игри што може да се играат во тој простор и со тој број на деца и секако, мислете на тие две три деца што секогаш се бељаџии на забави, за да не ви излезе роденденот од контрола.
