Вестите од вчера добија потврда, капитенот Рамос одби да коментира, но се чини дека Португалецот е одлучен во својата намера.
Не прекинуваат приказните околу заминувањето на Роналдо од Реал, денес Рамос одби да зборува за тоа, со порака дека не знае што се случува.
Медиуми блиски до клубот, не негираат дека нешто се подготвува, односно дека Португалецот има намера да си замине следното лето.
Дали е вистина дека тоа му го соопштил на Флорентино Перез и дека нема да се откаже иако има договор до 2021 година, тешко е да се каже.
Но, постојат неколку причини кои се наведуваат како клуч во неговата одлука.
1. Договор кој е многу послаб од оние на Нејмар и Меси. Сегашниот и поранешниот фудбалер на Барселона заработуваат неспоредливо повеќе, додека Роналдо прима 21 милиони по сезона.
Наводно минатото лето добил ветување дека ако остане, ќе започнат преговори околу подобрување на договорот, но тоа не се случило.
2. Роналдо има проблеми со навивачите, смета дека во клубот, но ниту на трибините не го ценат доволно и дека тоа на некој начин е порака дека треба да си замине.
3. Шпекулациите околу Нејмар го погодиле, не за доаѓање на Бразилецот во 2021 година, туку уште следното лето.
Имено, Перез верува дека ПСЖ ќе биде во сериозни проблеми да остане во границите на финансискиот фер плеј и ќе бидат принудени да се откажат од Нејмар.
Перез наводно е подготвен да го понуди и Асенсио како дел од договорот само за да дојде до потписот на Нејмар.
4. Одлуката Бензема да биде продаден. Кристијано е голем противник на тоа, во прашање е неговиот омилен соиграч и подготвен е и самиот да го напушти тимот, ако „деветката“ на Реал биде ставена на трансфер листата.
5. Проблемите со данок, односно фактот дека повеќе би заработувал во Англија поради различните закони.
Од одамна се споменуваше ПСЖ како негова можна следна дестинација, иако финансискиот фер плеј тешко би и дозволил такво нешто, а го имаат и Нејмар, додека во Јунајтед пречка е Мурињо.