Компанијата Pfizer оваа недела ќе испорача двојно помало количество на вакцини против COVID-19 за некои членки на ЕУ во споредба со договореното, поради што се зголемува незадоволството во Унијата.
Романија ќе добие 50 отсто од планираното количество оваа недела, а испораката ќе се зголемува постапно, па дури кон крајот на март Букурешт ќе го добие договореното количество, истакна заменик министерот за здравство Андреј Бачиу.
Слична е ситуацијата и во Полска, која во понеделникот доби 176.000 дози, односно 50 отсто помалку од очекуваното.
Чешката Влада поради проблемите со набавка, исто така, ја забавува кампањата за вакцинација.
– Мораме да очекуваме дека ќе има намалување на бројот на вакцинации во следните три недели, истакна чешкиот министер за здравство Јан Блатни.
Испораката на вакцината од Pfizer ќе биде помала за 15 отсто оваа недела, а следната за 30 проценти.
Pfizer им соопшти на Бугарија и на Полска дека ќе го надополни недостатокот од вакцините.
Официјални претставници од овие земји велат дека намалувањето на испораките ги поткопува нивните напори да спроведат масовна вакцинација.
Италија вчера се закани дека ќе ја тужи компанијата Pfizer. Унгарија денеска издаде прелиминарно одобрување за користење на вакцините против коронавирус на AstraZeneca и руската Sputnik V. Будимпешта побара од Брисел да влијае врз тоа Pfizer да се придржува кон планот за испорака.
Проблем поради намалените испораки на вакцината на Pfizer имаат и Канада и Швајцарија.
