Секој за време на лет со авион очекува мали потреси, но што е со оние екстремни турбуленции кои се појавуваат наеднаш и кои предизвикуваат страв од „неизбежна смрт“ кај патниците?
Овој вид на турбуленции ги предизвикуваат воздушните џебови, кои често се појавуваат „од ведро небо“, бидејќи се невидливи и поради тоа е тешко да бидат откриени.
Сепак, иако таквите турбуленции можат да предизвикаат паника, Маркус Вал од германско здружение за пилоти тврди дека тие се потполно безопасни.
„Наглите турбуленции и наглото понирање на авионот можат да бидат непријатни, но тоа не е ниту малку опасно за самиот авион“, вели Вал.
„Дури и поимот воздушен џеб залажува. Не постојат воздушни џебови, барем не во смисла на некои видови на дупки во воздухот“, додава Германецот.
Овој ефект всушност го предизвикуваат различните воздушни струи, кои на одредени места се допираат и создаваат нестабилни подрачја, поради кои авионот понекогаш „пропаѓа“.
„Авионот ја губи висината, што предизвика чувство слично на она како кога се возите на возот на смртта“, открива Вал.
Иако турбуленциите не се опасни за авионите, сепак тие можат да доведат до повреда на патниците.
Поради тоа, најдобро е кога патувате со авион постојано да сте врзани со безбедносниот појас.
Пилотите во поголемиот дел од случаите се обидуваат да ги заобиколат турбуленциите или брзо да реагираат со промена на правецот или висината на летот.