Натпреварот меѓу Пари Сен-Жермен и Барселона привлече големо внимание кај спортскиот свет и на трибините на „Паркот на принцовите“ можеа да се забележат бројни светски спортски икони.
Барселона победи со 3:2 против ПСЖ на гости и со тоа дојде до голема предност во четвртфиналето од Лигата на шампионите. Но, тоа треба да го докаже на реваншот за шест дена на домашен терен.
Натпреварот изобилуваше со пресврти и убави потези, а на трибините на „Паркот на принцовите“ меѓу оние кои уживаа во натпреварот имаше голем број на фудбалски и спортски легенди.
Натпреварот го следеа Дидје Дешам, Луиш Фигу, Клод Макелеле, Давид Жинола, Раи, Франк Кесие, Ф1 возачот Пјер Гасли и многу други достоинственици од светот на спортот.
Но, еден човек потполно го украде шоуто. Станува збор за еден од најдобрите фудбалери на сите времиња и човек кој остави длабока трага играјќи за овие две екипи. Секако, тоа е Роналдињо, кој останува миленик на навивачите, и во Барселона и во ПСЖ.
Токму затоа Роналдињо беше специјален гостин на мечот одигран синоќа и славниот Бразилец откако излезе на теренот доби громогласни аплаузи од сите трибини. Самиот Роналдињо уживаше во моментот, што се гледаше во неговото расположение.
Интересно, меѓу гостите на натпреварот беше и претседателот на Република Српска, Милорад Додик, кој тврдеше дека на натпреварот дошол на покана на претседателот на ПСЖ, Насер Ал-Хелајфи.
