Лидерите на етничките групи Хереро и Нама го отфрлија договорот предложен од Германија, која призна дека злосторствата на германските колонијалисти пред повеќе од 100 години во денешна Намибија биле геноцид. Советот на племенските лидери бара да се одложи планираното потпишување на договорот меѓу двете земји.
Владата во Берлин ѝ понуди на Намибија 1,1 милијарда евра во рок од 30 години, а Советот признат од намибиската Влада во изјавата го нарече „неприфатлив“ и „навреда за нивното постоење“. „Навредливата сума“ е одбиена, но Советот го поздрави фактот дека германските власти го признале геноцидот, ја преземале одговорноста за злосторствата и објави дека ќе побара простување.
Племенските водачи бараат повторно преговарање за репарациите. Друга организација што ги обединува членовите на групата Хереро веќе го нарече германскиот предлог „измама и пропаганда“.
