Еден од најдобрите кошаркари на сите времиња, Американецот Бил Расел, почина на 88-годишна возраст, објави неговото семејство на социјалните мрежи.
„Бил Расел, најплодоноснииот победник во историјата на американскиот спорт, почина во мир во 88. година од животот, покрај својата сопруга Џени“, објави синоќа семејството на еден од најголемите светски кошаркари.
Расел со Бостон Селтикс освои 11 титули, од кои две како играч-тренер (1968, 1969), а се запиша во историјата и како прв црномурен тренер во НБА лигата. Играше на позицијата центар.
Пет пати беше избиран за најкорисен играч на Лигата, а 12 пати беше учесник на Ол-стар натпреварите.
Во кариерата Расел се закити и со златен олимписки медал во 1956 година кога во финалето во Мелбурн САД го совлада СССР со убедливи 89:55.
Расел се родил на 12 февруари 1934 години во Монро, Луизијана. Кариерата ја почна во колеџ тимот на Универзитетот Сан Франциско, а во 1956 година беше драфтуван од Бостон Селтикс. Се пензионираше по 13 сезони, сите во дресот на Бостон. Како тренер освен Бостон ги водеше и Сиетл Суперсоникс (4 сезони) и Сакраменто Кингс (1 сезона). Од тренерскиот занает се повлече во 1988 година.
