Њујорк, 19 февруари 2019 (МИА) – Славниот американски морнар Џорџ Мендонса почина викендов, два дена пред неговиот 96 роденден. Инаку, тој е момчето фотографирано во 1945 година, додека бакнува девојка на Тајмс сквер, славејќи го завршувањето на Втората светска војна.
Неговата ќерка денеска соопшти дека Мендонса починал во неделата од срцев удар.
Мендонса е роден на денешен ден, 19 февруари 1923 година. На безвременската фотографија од 1945 година тој ја бакнува Грета Зимер Фридман, стоматолошка сестра во болничка униформа.
Три години по фотографирањето, во 1948 година Мендонса се оженил за Рита Петри.
Фотографијата на Алфред Ајзенштет од 14 август 1945, ден по капитулацијата на Јапонија, е една од најпрепознатливите фотографии на 20 век.
Грета Фридман почина во 2016 година, на 93-годишна возраст.