„Стауафест - Другото лице на улицата“ и оваа како и секоја претходна година ќе испрати глобална порака.
Фестивалот ќе се одржува денес и утре, на 4 и 5 септември, од 18 до 22:30 часот, на Плоштад Македонија во Скопје
Оваа година беше избрана актуелната тема – коронавирусот – која го „парализираше“ светот во 2020, па конкретниот постулат на фестивалот е: „Скопје во време на корона“.
„Целта на овогодинешниот фестивал е преку уличните живи статуи да прераскажеме во вкочанета слика, каков беше, а и сѐ уште е животот од месец март па наваму и што точно му се случува на нашиот град, се разбира држава, па и светот воопшто.
Поставката на фестивалот во кој сите артисти ќе бидат идентични по однос на боја (што преносно, односно симболично означува душа - Tabula Rasa: сите сме исти под сонцето) да испратиме гласна порака преку молчаливата уметност каков не сакаме да биде периодот кој следува, односно она што здравствените работници го нарекуваат втор бран“, додаваат од организацијата.
Сите протоколи за заштита од COVID-19 ќе бидат во целост запазени според мерките на СЗО и Министерството за здравство, напоменуваат организаторите.
