По завршување на истражната постапка и прибирање на доказите во предметот, Oсновното јавно обвинителство – Скопје денеска поднесе Обвинителен акт против едно лице за сторено кривично дело „запуштање и малтретирање на малолетно лице“.
Мајката се товари дека на 31 август годинава физички го малтретирала своето 18-месечно бебе.
Јавниот обвинител заедно со доставениот Обвинителен акт, достави и предлог за продолжување на мерката притвор за обвинетата.
Инцидентот се случил на 31 август околу 18 часот на улицата „Аминта Трети“ кога осомничената идентификувана како А.Х., на 30 години од Скопје, започнала вербална расправија со нејзината свекрва и потоа во еден момент го зела своето 18-месечно дете и почнала физички да го малтретира, удирајќи го со раце по главата и по телото, а во еден момент го кренала високо и го фрлила на земја.
Настанот го забележал случаен минувач кој пријавил во Единицата за информации и команда при СВР Скопје, по што од страна на полициски службеници веднаш било излезено на местото и известена службата за итна медицинска помош, бидејќи било проценето дека детенцето не е во добра здравствена состојба.
По укажаната медицинска помош детето било пренесено на Детската клиника во Клинички центар „Мајка Тереза“, каде што било примено и задржано за натамошно лекување, по што подоцна било пренесено на Клиниката за неврохирургија каде му биле извршени потребните медицински испитувања, при што од страна на лекар специјалист неврохирург било констатирано дека детето има нагмечување на главата и потрес на мозокот.
