Полицајката која во неделата застрела млад Афроамериканец во близина на Минеаполис е уапсена и ќе биде обвинета за убиство од небрежност, соопшти вчера канцеларијата за криминалистички работи во Минесота, која ја надгледува истрагата.
„Ким Потер е уапсена и ќе биде префрлена во затвор во округот Хенепин за убиство од небрежност“, се вели во соопштението.
48-годишна полицајка пукала во Данте Рајт, 20-годишен Афроамериканец, за време на рутинска контрола во населбата Бруклин Центар, близу Минеаполис. Таа рече дека по грешка помислила дека електричниот шокер што го држел Рајт е пиштол.
*Внимание! Содржината на видеото може да Ве вознемири!
Полицајката поднесе оставка во вторникот, како и началникот на полицијата Бруклин Центар. Таа се соочува со затворска казна од 10 години.
Инцидентот што се случи додека трае судењето за убиството на Афроамериканецот Џорџ Флојд, беше проследено со три ноќи насилни протести.
И покрај полицискиот час и бројните полициски засилувања на улиците, во вторникот во насилството меѓу демонстрантите и полицијата беа приведени 78 лица.
Семејството на Данте Рајт го критикуваше оправдувањето на полицајката и истакна дека „полициски службеник со 26-годишно искуство знае како да разликува електричен шокер од огнено оружје“, напиша нивниот адвокат Бен Крамп во изјавата.
„Ќе продолжиме да се бориме за правда за Данте, неговото семејство и сите маргинализирани. Ние нема да застанеме сѐ додека не постигнеме вистински реформи во полицијата и судството“, додаде тој.
