Тело на млад Сириец е пронајдено во Полска во близина на границата со Белорусија, соопшти полската полиција.
Илјадници мигранти од Блискиот Исток се кријат во шумите меѓу Белорусија и Полска. Веќе има мртви и се стравува за безбедноста на останатите со оглед на тоа што се наближуваат зимски временски услови.
„Вчера во шума во близина на границата е пронајдено тело на млад Сириец“, соопшти на Twitter полската полиција.
Од полицијата додаваат дека не можеле да ја утврдат причината за смртта на самото место на настанот.
Телото е најдено во период на се посилна меѓународна напнатост поради мигрантската криза, а белоруските соседи предупредуваат дека ситуацијата може да ескалира во воен конфликт. Загриженост изрази и американскиот претседател Џо Бајден.
Рускиот претседател Владимир Путин, најважниот сојузник на белорускиот претседател Александар Лукашенко, изјави дека Белорусија нема ништо со мигрантската криза.
Полската погранична полиција соопшти дека во текот на ноќта белоруските војници го оштетиле делот од привремената ограда што Полска ја подигна за да ги одврати мигрантите.
