Во борбата против упорниот смог во Полска, научниците тестираат нов топ кој користи звучни бранови за да ги истурка токсичните честички во атмосферата и да им овозможи на жителите да дишат поквалитетен воздух.
Поставен на врвот на метален контејнер, експерименталниот уред се состои од голем превртен конус кој испушта силен звук на секои шест секунди. Целта е со звук да се избрка смогот од Калварја Зебрзидовска, кој, како и многу други полски градови, секоја зима се соочува со овој проблем кога граѓаните палат печки кои го загадуваат воздухот.
Од оџаците излегува густ чад, а со заоѓањето на сонцето по градот се спушта густ смог. Воздухот во Полска е меѓу најзагадените во Европа и во најлошите делови од годината постојано ги надминува границите поставени од ЕУ.
Научниците тврдат дека топот, со создавање звучни бранови, придонесува за намалување на концентрацијата на штетните ПМ2,5 и ПМ10 честички во градскиот воздух.
Ударниот бран го одбива загадениот воздух на поголеми височини
„Ние користиме вертикален ударен бран создаден со согорување на ацетилен и воздух“, рече Доминик Грибос од Металуршкиот и рударски факултет во Краков, еден од пронаоѓачите на топот.
„Бранот го исфрла загадениот воздух на повисоки надморски височини“, изјави тој за AFP. Отровните честички се лансираат во висина од неколку стотици метри, што ги прави безопасни за жителите.
„Ако го користиме топот на растојание од половина час до еден час, загадувањето се намалува за 15 до 30 отсто во рок од два, три километри од топот“, рече Грибос, додавајќи дека ефектите траат „помеѓу еден и три часа“.
Жителите го поддржуваат тестирањето
Истражувачите се обидуваат да ја одредат потребната фреквенција и времетраење на отчукувањата на звукот, како и времето потребно за целата процедура.
Цената се проценува на 1.000-1.500 злоти (220-330 евра) по час користење. Грибос рече дека се надева дека пронајдокот може да има комерцијална примена, особено во Полска. Жителите на Калварја Зебрзидовска најмногу ја поддржуваат оваа идеја, и покрај звукот.
„Смогот овде е исклучително густ. Не можеме да ги проветриме становите поради смрдеата. Затоа, ако може да помогне, нека тестираат. Едвај го слушаме звукот - тоа е како огномет“, рече Јоланта Волкович, 43-годишна сметководителка.
