Во четврток попладне во Скопје најавени се два големи протеста, и тоа на „Протестирам“, кои се противат на одлуката на претседателот на државата Ѓорге Иванов за помилување на политичарите, и на ГДОМ кои бараат на вонредните парламентарни избори на 5-ти јуни да се реши речиси двегодишната политичка криза.
Граѓанското движење за одбрана на Македонија (ГДОМ) за денеска пред Собранието на Република Македонија во центарот на Скопје најавува голем протест. Тие бараат одржување на изборите на 5-ти јуни како единствен излез од длабоката политичка криза.
Вчерашниот, осми по ред протест на граѓанската организација „Протестирам“, заврши со повикот „Секој ден во 6“, па така, во четврток во Скопје се очекува да се одржи протест на кој граѓаните кои бараат повлекување на одлуката на претседателот на државата за аболиција и одложување на изборите. И покрај најавите, засега нема официјална информација за можно денешно одложување на овој протест.
За петок, пак, во 14 часот закажан е и собир на граѓани во организација на Здружението на поранешни политички затвореници и прогонети Албанци во Македонија, на Организацијата на воени ветерани на ОНА (УЧК), Движење за реформи – ДПА и на партијата Националнa демократска преродба (RDK). Тие ги повикуваат сите Албанци, невладини организации, независни интелектуалци, политички партии и сите граѓани на масовен протест со паролата „Стоп на овој систем“.
„Мултидимензионалната криза што ја зафати земјата од нефункционирањето и на невладеењето на правото, партизацијата на институциите, заобиколувајќи го правото на целосна еднаквост на Албанците и Македонците, поттикнување етнички тензии, директно ја разнишаа основата на стабилноста и постоењето на правната држава“, велат организаторите на утрешниот протест.
„Одлуката на Иванов за аболиција на македонските политичари и нивните слуги Албанци кои го прекршиле законот, кои ја злоупотребиле својата службена должност, се инкриминирани во организиран криминал и корупција, претставува уште еден доказ дека во Македонија постојат двојни стандардни и дека Албанците се третирани како граѓани од втор ред. Наоѓајќи се во ваква ситуација, каде што политичкиот дијалог не дава надеж, каде на најбрутален начин се прекршуваат договорите потпишани со посредништво на меѓународната заедница, каде затворите се логор полн со невини Албанци, каде што правото на целосна рамноправност на Албанците бесрамно се продаде од страна на група политички слуги кои себе си се нарекуваат Албанци, нѐ присилуваат нас како Албанци, кои имаме совест и карактер, без хипотеки, да преземеме координирана акција за да го искажеме нашиот револт против овој систем што нè заробува, што нѐ омаловажува и понижува, што нѐ негира и крши нашето право за целосна рамноправност“, се вели во прогласот на организаторите на овој протест.
