Кина е најголемиот извозник на автомобили во светот, а компанијата BYD мора да купи уште 7 товарни бродови поради зголемената побарувачка.
Во јануари BYD започна да го користи својот прв товарен брод специјално наменет за извоз на автомобили, а во следните две години планира да додаде уште 7 бродови во својата флота со цел да ја подобри својата глобална продажба и уште повеќе да ги испорачува своите возила.
Првиот товарен брод изграден за BYD може да превезува до 7.000 автомобили и е исто така првиот брод за транспорт на возила изграден во кинеско бродоградилиште што се користи исклучиво за извоз на домашни модели по морски пат. Изграден е од компанијата CIMC Raffles, а неодамна започна изградбата на уште два товарни брода во градот Кантон. За оваа работа е задолжена CSSC Offshore & Marine Engineering, а нивниот капацитет ќе биде по 7.000 возила.
Кина стана најголемиот извозник на автомобили минатата година, земајќи ја круната од Јапонија. BYD верува дека може да ги намали транспортните трошоци со користење на сопствени бродови наместо да изнајмува други.
Кинеските производители имаат очајна потреба од нови бродови за да ја задоволат зголемената побарувачка. До ноември минатата година имало само 40 товарни бродови за превоз на автомобили во сопственост на кинески транспортни компании, а нивниот заеднички капацитет бил околу 110.000 возила. За споредба, јапонските компании имаат бродови кои можат да пренесат вкупно 1,6 милиони возила. Дури и капацитетот на Норвешка е 930.000 автомобили.
Покрај BYD, и компанијата SAIC планира да набави 14 товарни бродови во следните три години за својата логистичка компанија SAIC Anji Logistic, а некои од нив ќе имаат капацитет од 9.000 возила. До ноември, кинеските сопственици на бродови нарачале 37 бродови за транспорт на автомобили, со комбиниран капацитет од 290.000 возила.
Нешто слично се случи во Јапонија во 70-тите кога извозот на автомобили се зголеми од 1,1 милион единици во 1970 година на 6 милиони единици во 1980 година. Локалните компании мораа да изградат нови и поголеми бродови за транспорт на автомобили за да се справат со побарувачката.
