Во Португалија бројот на кражби може да порасне за 40% во однос на минатата година бидејќи жителите поради зголемените цени на храната крадат конзерви риба, масло, леб, кафе и други основни намирници, пренесе португалскиот Expresso, повикувајќи се на официјални податоци.
„Овој феномен е особено изразен во големите градови како Лисабон и Порто“, изјави Гонсало Лобо Хавиер, потпретседател на португалското здружение на дистрибутерски компании (АПЕД). Нема никакви сомнежи дека луѓето ги крадат тие работи за да ги јадат. Ова е прв знак на тешка социјална криза“, додаде тој.
Од португалската полиција велат дека се пријавени 452 кражби во супермаркети во периодот од јануари до јуни. Ако продолжи трендот на крадење, кражбите ќе пораснат за 40 проценти во однос на минатата година.
Луѓето погодени од поскапувањето крадат и замрзната риба, особено бакалар која традиционално се јаде во Португалија, земја со 10.3 милиони жители.
Полицијата вели дека многу продавници не пријавуваат кражби на намирници како компири, но се повеќе трговци се со вградени алармни системи.
„Луѓето се очајни, кријат кутии со млеко и конзерви риба во торби или јакни за да јадат или да ги нахранат децата“, вели Клаудио Фереира, претседател на здружение на приватни безбедносни компании.
Во просек, цените на храната пораснаа 17%, а инфлацијата особено ја погоди средната класа која се соочува и со поскапувања на сметките. На работ на сиромаштија се 1.9 милиони жители со примања помали од 554 евра месечно.
