Повеќе од половината компании во Германија(54%) сакаат да продолжат да работат од дома и откако ќе заврши пандемијата на коронавирусот, покажаа резултатите од истражувањето на институтот ИФО и анкетата на LinkedIn.
– Кризата со коронавирусот може да биде поттик за постојан работен ангажман од дома, изјави Оливер Валк, директор на Центарот за индустриска организација и нови технологии и коавтор на оваа студија.
Податоците од истражувањето на ИФО покажуваат дека три четвртини од компаниите во Германија се согласиле со дел од нивната работна сила да работат од дома, како начин да се справат со кризата.
Во исто време, истражувањето спроведено меѓу членовите на професионалната мрежа LinkedIn во Германија, покажува дека речиси половина од испитаниците рекле дека работат од дома само поради пандемијата.
– За многу компании, овие нови работни аранжмани вклучуваат значителни инвестиции во дигитална инфраструктура и нова комуникациска технологија. Целосно враќање на стариот начин на работа е малку веројатно, објаснува Валк.
Покрај тоа, една анализа покажува дека бројот на прегледи на огласи за работа од дома на LinkedIn се зголемил за повеќе од двапати.
– Знаеме дека недостигот на социјален контакт, кој го вклучува работата од дома, на долг рок може да биде товар и дека дигиталниот свет сам по себе не ги овозможува сите аспекти на креативна размена или трансфер на знаење и идеи. Затоа, поверојатно е дека ќе преовладува комбиниран модел, кој вклучува работа во компанијата и работа од дома. На тој начин се здружуваат предностите од автономијата и флексибилноста на работа од дома со придобивките од социјалниот контакт на работното место, објаснува Жан -Виктор Алипур, коавтор на студијата за ИФО.