Бразилскиот ММА борач и член на УФЦ организацијата, Пауло Коста, е обвинет за удирање медицинска сестра во текот на вакцинација против коронавирусот.
Бразилскиот весник Globo пишува дека 31-годишниот Коста не сакал да се вакцинира против коронавирусот, но сакал да добие потврда за вакцинација па кога медицинската сестра се обидела да го спречи да ја напушти болницата со потврдата, добила удар со лакот.
Од полицијата истакнаа дека борачот насилно се ослободил од сестрата во момент кога таа се обидела да го запре на излез од болницата.
„Потврдата за вакцинација веќе била пополнета, но тој сепак рекол дека не сака да се вакцинира. Сакал да излезе со потврдата, но болничкиот персонал тоа не го прифатил. Во еден момент ја удрил сестрата која го фатила за рака, поточно насилно се ослободил од неа“, стои во полициското соопштение.
Се наведува дека Коста е пуштен од притвор и сега му следи сослушување на суд.
Од друга страна, тој тврди дека примил вакцина и дека во болницата не сакале да му дадат потврда, што наводно предизвикало стрес кај него.