Во дербито на 8. коло на шпанската Ла Лига, Барселона синоќа на стадион од „Љуис Компањс“ (поранешен „Монтжуик“) ја победи Севиља со 1:0, а пресуди бизарниот автогол на Серхио Рамос.
Во тек беше 76. минута кога 16-годишниот Ламин Јамал со глава ја прати топката во петерецот со намера да асистира, а Серхио Рамос несмасно ја испрати во сопствената мрежа за триумф на Каталонците.
Овој гол домашните го прославија со дополнителен ентузијазам бидејќи го постигна некогашен голем ривал од Реал, а за него се поврзува посебна случајност.
Имено, на социјалните мрежи се појави видео од 2016 година на кое се гледа како Рамос влегува на теренот на „Ноу Камп“ држејќи го за рака тогаш 9-годишниот Јамал, член на Ла Масија од Барселона.
Јамал е роден во 2007 година од татко Мароканец и мајка од Екваторијална Гвинеја и е дете на Барселона. Може да игра на десната страна или како центарфор, како и зад напаѓачите.
Поради стилот на игра го споредуваат со Лионел Меси и важи за најголема надеж на каталонскиот клуб.
Инаку, дебитираше за првиот тим минатата сезона во 32. коло од Ла Лига против Реал Бетис кога на 15 години испиша историја и стана најмладиот фудбалер кој настапил за каталонскиот клуб.