Иако Тотенхем даде зелено светло, селекторот на Јужна Кореја реши да не го вклучи Сон во репрезентацијата за претстојните Летни олимписки игри во Токио.
Јужна Кореја на Олимпијадата ќе настапи без својот најдобар играч, ѕвездата од Премиер лигата, Сон Хјон-мин. И тоа поради одлука на селекторот Ким Хак-бум кој даде и објаснување зошто најдобриот корејски фудбалер нема да ги збогати Игрите.
„Му се заблагодарив и му се извинив на Сон бидејќи покажа колку многу сака да биде во тимот и да игра на Олимпијатада. Тој дури и разговараше со Тотенхем и конечно го пуштија да настапи. Навистина го цениме тоа“, вели селекторот пред корејските новинари.
„Одлуката ја гледам од различни агли. Најлесно е да го ставам на списокот, но тој е играч кој треба да го заштитиме. Гледајќи долгорочно, тренинзите и распоредот на натпревари на Олимпијадата можат да го преморат. Сон има одлична мускулатура, но кога лани играше за Тотенхем покажа знаци на повреда. Тетивите се многу важни за играчите кои милуваат да прават спринтови како него. Мислам дека може да се премори, а тоа е ризик за повреда“, ја објаснува селекторот својата одлука која изненади и разочара многумина.
„На крајот донесов тепшка одлука за која ќе мора да понесам одговорност. Кога Сон е повреден луѓето велат дека премногу сме го користеле. Доколку се повреди, ќе биде тешко јас да ја преземам одговорноста“.
Јужна Кореја го сонува олимпиското злато кое никогаш го нема освоено. Најблиску беше во 2012 кога загуби во полуфиналето и потоа се закити со бронзата. Но, на почетокот од септември почнува последната фаза од азиските квалификации за Мундијалот 2022, а свеж Сон за пласман на завршницата има предност пред Олимпијадата.
„Одигра 51 натпревар минатата сезона. Мислам дека треба да го заштитиме. Доколку се повреди тоа ќе биде голема загуба за квалификациите за Мундијалот, како и за предсезоната на Тотенхем. Цела ноќ размислував за ова“, заврши тој.
Јужна Кореја на Олимпијадата доаѓа како актуелен младински шампион на Азија. Сон требаше да биде еден од тројцата постари играчи во тимот, колку што е дозволено согласно правилата. Кореанците се во групата Б заедно со Нов Зеланд, Хондурас и Романија.