Обрнете внимание на јасните знаци на недостаток на витамини кои се неопходни за правилен развој на децата.
Недостаток на витамини и минерали кај децата се јавува почесто отколку што би очекувале, а за сето тоа виновник најчесто е монотоната исхрана, предупредуваат педијатрите.
Често се случува храната што ја јадат децата да е монотона и нехранлива, а сè почесто децата консумираат храна полна со рафиниран шеќер, како и преработена храна која не е богата со нутритивни вредности. Ова, меѓу другото, доведува до недостаток на витамини.
Со оглед на тоа што недостатокот на витамини и минерали кај децата може да стане сериозен проблем кој е главна и водечка причина за бројни болести, важно е да се видат и препознаат различните знаци на недостаток и да се надомести со правилна исхрана.
Во продолжение дознајте како да препознаете недостаток на одредени витамини.
Недостаток на витамин А
Недостатокот на витамин А доведува до суви очи, кафени дамки на склерата, но и до чести стомачни и респираторни инфекции кај децата.
Недостаток на витамин Б
Недостатокот на витамин Б комплекс доведува до слаб апетит, слабост и раздразливост, како и доцнење во развојот. Покрај тоа, вообичаени се промените во расположението.
Недостаток на витамин Ц
Децата на кои им недостига витамин Ц во организмот често имаат проблеми со отекување на непцата, како и крварење при четкање на забите. Покрај тоа, тие често имаат екстремно сува коса и болки во зглобовите.
Недостаток на витамин Д
Недостатокот на витамин Д може да доведе до слабеење на коските (болест наречена „рахитис“ кај малите деца). Како резултат на тоа, може да дојде до виткање на коските на нозете. Дополнително, недостатокот на витамин Д може да доведе и до побавно одење, одложено никнување на забите и зголемен ризик од скршеници на коските.
Недостаток на калциум
Недостатокот на калциум обично е предизвикан од недостаток на витамин Д, па симптомите најчесто се поврзани со недостаток на истиот витамин. Покрај веќе споменатите симптоми, може да се појават и грчеви во мускулите.
Недостаток на железо
Замор, недостаток на концентрација, раздразливост и слаб апетит се карактеристични за недостаток на железо кај децата.
