Фернандо Виљависенсио, кандидат за претседател на Еквадор, беше убиен на предизборен митинг во Кито.
Виљависенсио бил заменик во собранието, а бил убиен кога влегувал во автомобилот со кој требало да се оддалечи од местото на митингот, јавува BBC.
Член од неговиот изборен штаб за локалните медиуми изјавил дека Виљависенсио влегувал во својот автомобил кога напаѓачот му пришол и го застрелал во главата.
Актуелниот претседател на Еквадор, Гиљермо Ласо, изјави дека „ова злосторство нема да остане неказнето“.
Очевидци тврдат дека Виљависенсио (59) бил застрелан три пати. Во престрелката што следела бил ранет и осомничениот за атентатот, а подоцна починал од повредите.
Првиот круг од претседателските избори во Еквадор треба да се одржи на 20 август.
Претседателот Ласо, кој нема да се кандидира за функцијата, рече дека е „шокиран“ од убиството.
Недамнешниот пораст на насилниот криминал, поттикнат од зголеменото присуство на нарко-картелите во Еквадор, е централна тема во овогодинешната изборна кампања.
Минатиот месец, претседателот Ласо прогласи вонредна состојба и полициски час во три провинции, по убиствата поврзани со организираниот криминал.
Кампањата на Виљависенсио, освен на безбедноста на граѓаните, беше фокусирана и на борбата против корупцијата, со која се занимаваше и како новинар, но и на борбата за намалување на уништувањето на животната средина.
Штабот на Виљависенсио минатата недела објави дека тој и членовите на тимот добиле закани од водач на банда за шверц на дрога.
Виљависенсио беше еден од 8-те кандидати во првиот круг на изборите, но тој не беше во водство, според анкетите на јавното мислење.
Агустин Интриаго, градоначалникот на градот Манта, беше убиен во Еквадор во јули, а Омар Менендес, кандидат за градоначалник на градот Пуерто Лопес, беше убиен во февруари.
Другите претседателски кандидати изразија сочувство до семејството Виљависенсио.
