Близу ГП „Ќафасан“, полициски службеници синоќа приведоа едно лице државјан од Република Албанија, кај кого се пронајдени 16 пакувања марихуана со вкупна нето тежина од повеќе од 15 килограми, соопшти МВР.
– Околу 20:30 часот, вчера полициски службеници од Бирото за јавна безбедност - Оддел за сузбивање на организиран и сериозен криминал, Единица за недозволена трговија со дрога во соработка со Оддел за специјални полициски операции и СВР Охрид, на подрачје на Струга, во непосредна близина на магистралниот пат А2-Е852 (на околу 2 километра од ГП „Ќафасан“) пресекоа канал за недозволена трговија со марихуана од Република Албанија во Република Северна Македонија и запленија 16 пакувања со вкупна нето тежина од повеќе од 15 килограми, а го приведоа Е.Х. (20) од Република Албанија, посочуваат од МВР.
Од МВР соопштуваат дека против Е.Х. до ОЈО за ГОКК ќе биде поденесна кривична пријава за сторено кривично дело „неовластено производство и пуштање во промет наркотични дроги, психотропни супстанции и прекурсори” по член 215 ст.3 од Кривичниот законик и во текот на денешниот ден ќе биде изнесен пред судија на претходна постапка.
Од Министерството за внатрешни работи информираат дека продолжуваат со засилени мерки и активности за сузбивање на недозволената трговија со наркотични дроги.
