Охрид, 18 јуни 2019 (МИА) – Здружението на вработените во судската администрација во соработка со Македонското здружение за заштита на работа во Основниот суд во Охрид почна да го реализира проектот „Безбедност и здравје при работа на вработените во судските институции“.
Весна Ристевска од Здружението за заштита при работа, појасни дека целта на проектот поддржан од ЕУ е да се зголемат капацитетите на граѓанските организации, да се зголеми нивното влијание за подобрување на условите за работа, намалување на повредите и професионалните заболувања во земјата.
Статистичкките податоци покажуваат зголемување на бројот повреди и несреќи при работа, од кои најголем број во градежништвото и земјоделството, но и во администрацијата преку форми на професионални заболувања.
– Причина за тоа се лоши услови за работа. Инициравме процес да утврдиме кои се причините, се спроведува ревизија за утврдување дали има недоследности во легислативата, која треба да покаже дали е потребна негова измена или носење сосема нов Закон за работа, рече Ристевска.
Истражувањата уште утврдиле дека работниците многу малку знаат за своите права за безбедна и здрава работна средина.
– Потребна е превенција, зголемување на свеста кај работниците за нивните права, нивна поголема информираност како да остварат пристап до права и правда. Примерите работниците да се плашат од губење на работното место генерално покажува дека работниците имаат многу мала комуникација со работодавците, рече таа.
Борче Мирчески, претседател на Здружението на судска администрација рече дека можеби вработените во институциите сметат дека не се подложни на повреди при работа, но факт е дека и тие страдаат од одредени заболувања, предизвикани токму од дејноста што ја вршат.
– Пилот-проектите спроведени во судовите во Охрид, Велес и Штип покажаа дека вработените на работните места и во институциите се соочуваат со мускулно-скелетни промени и болести, рече тој.
Решение се бара преку обезбедување ергономска опрема како бироа, столови, сѐ до прирачник со препораки за одредени вежби за одржување на физичка кондиција и во насока на намалување на промените предизвикани од самиот тип на работното место. Се размислува и за обезбедување простории во институциите каде би можеле вработените да практикуваат вежби.
Дури 98 отсто од испитаниците опфатени со пилот-проектот одговориле дека секојдневно се соочуваат со болки во мускулно-скелетниот систем. Генерално, фигурира податокот дека како нација, Македонците многу седат, малку физички се активни.
