Русија и Украина објавија дека не постигнале никаков напредок по еднодневните разговори со француските и германските официјални лица, чија цел беше да се стави крај на осумгодишниот сепаратистички конфликт во источна Украина.
Тоа означува назадување во напорите за ублажување на ширење на украинска криза, а поради која Русија распореди повеќе од 100.000 војници во близина на украинската граница.
Рускиот претставник Дмитриј Козак на брифинг по вчерашните разговори во Берлин изјави дека не било можно да се премине преку различните толкувања на Русија и Украина околу договорот од 2015 година кој имаше за цел да ја заврши борбата меѓу проруските сепаратисти и украинските владини сили.
„Не успеавме да премиенеме преку тоа“, изјави украинскиот претставник Андриј Јермак.
Додаде дека и двете страни се сложиле разговорите да продолжат.
„Се надевам дека во брзо време повторно ќе се состанеме и ќе ги продолжиме преговорите. Сите сме одлучни да постигнеме резултат“, изјави тој.
Набљудувачите на Организацијата за безбедност и соработка во Европа (ОБСЕ) известуваат за чести прекршувања на договорот, понекогаш со стотици инциденти на ден. Украина соопшти дека од 2014 година се убиени околу 15.000 луѓе.
Претставниците на Русија, Украина, ОБСЕ и двата сепаратистички региони потпишаа договор од 13 точки во Минск во февруари 2015 година, кој беше поддржан и од лидерите на Франција и Германија.
Рускиот министер за надворешни работи Сергеј Лавров вчера ја обвини Украина дека се обидува да го ревидира договорот и да ги избере само елементите кои се најповолни за неа.
Украина вели дека е посветена на договорот.