Претседателот на парискиот гигант тврди дека ова натпреварување никогаш нема да заживее.
Претседателот на Пари Сен-Жермен, Насер Ал-Хелајфи изјави дека францускиот клуб не е заинтересиран за проектот на европската Суперлига, пренесува реномираниот шпански спортски весник Marca.
Проектот Суперлига започна во март минатата година, но брзо беше затворен со повлекувањето на англиските тимови. Идејата се уште ја поддржуваат Реал, Барселона и Јувентус, но францускиот гигант тврди дека таа нема да заживее.
„Што се однесува до нас, Супер лигата е одамна мртва. Реал ја освои Лигата на шампионите. Заслужи да ја освои, славеа со денови, недели, а сега велат дека не сакаат да ја играат. Ако не се среќни, не мора да играат во Лигата на шампионите. Тоа е најдоброто натпреварување во светот. Повторувам, Суперлигата е мртва за мене“, изјави Ал-Хелајфи.
Првиот човек на ПСЖ одговори и на жестоките критики на предводникот на Реал по одлуката на Килјан Мбапе да го продолжи договорот со „Светците“, иако францускиот репрезентативец беше на прагот да се пресели во мадридскиот клуб.
„Го почитувам Реал, тоа е голем клуб, но Килјан не остана поради парите. Понудата на Реал беше подобра од нашата. Тој е наш фудбалер, но имаше понуди и од некои англиски клубови, не само од Реал. Килјан е заинтересиран за проектот. Тој е Парижанец, Французин, сакаше да остане во нашиот клуб за да го претставува својот град и својата земја. Парите не му се најважни, тој сака проект и сака да победи“, итврди претседателот кој доаѓа од Катар.
Повтори дека Реал лани понудил 180 милиони евра за Мбапе.
„Не знам што зборуваат во Мадрид, но веќе 18 месеци знам дека Мбапе сака да остане. Тој слушна дека во Мадрид велат дека сака да замине во Реал, но тоа едноставно не беше точно. Сега се зборува за последната понуда на Реал, но минатото лето понудија 180 милиони евра, кои јас ги одбив. Луѓето ми рекоа дека сум луд, затоа што сега Мбапе наводно може да оди бесплатно. Разбирам дека се разочарани во Реал, но не е фер сега да кажуваат лаги за Мбапе“.
Претседателот на ПСЖ изјави и дека не е загрижен поради обвинувањата дека францускиот клуб го нарушува финансискиот фер-плеј.
„Имаме фудбалски проект кој го градиме и кој мора да расте. Не се грижиме, бидејќи немаме време за губење. Секоја година, секое лето, истата приказна. Секогаш фер-плеј и басните дека не го почитуваме. Знаеме што смееме да направиме, кого можеме да го донесеме. Знаеме многу подобро од оние кои ни делат совети. Беше кажано дека е финансиски невозможно да го донесеме Лионел Меси, а ние заработивме пари од него“, заклучи претседателот на Пари Сен Жермен.
