Пари Сен Жермен ѝ понуди на првата ѕвезда на тимот, Килјан Мбапе, договор кој досега не е виден во светот на фудбалот, сè со цел да го задржи во тимот и по истекот на договорот.
Договорот на Мбапе со клубот од Паркот на принцовите истекува на крајот на сезоната и тој може да преговара со заинтересираните клубови од 1 јануари.
За него најголем интерес покажаа Реал Мадрид и Ливерпул, но според последните информации се чини дека ниту ПСЖ не се откажал да го задржи во главниот град на Франција.
RMC објави дека ПСЖ подготвил астрономски договор за Мбапе со кој би станал еден од најплатените спортисти во светот и би заработувал нереални 100 милиони евра годишно или два милиони евра неделно.
Новинарот Даниел Риоло истакна дека верува дека само ПСЖ е во состојба да му понуди вакво нешто на фудбалер.
„Тоа би била понуда каква што досега не е видена, се работи за нешто неверојатно, понуда според која тој би заработувал повеќе од 100 милиони евра годишно“, изјави Риоло за RMC и додаде:
„Новиот договор ќе биде од корист за неговиот брат и семејството, како и агенцијата на играчот што мајката на Мбапе сака да ја основа“.
Мбапе постигна 26 гола на 25 натпревари за ПСЖ оваа сезона, а му се придружува и помладиот брат Итан кој може да биде клучен фактор за неговиот престој во Париз.