Кристијан Пулишиќ е многу возбуден што е дел од Милан по сензационалното деби во Серија А, каде на терен повторно заигра со својот поранешен соиграч од Челси, Оливје Жиру. „Почувствував дека ова е перфектен чекор за мојата кариера“.
Американскиот офанзивец не можеше да посака подобро деби во 2:0 победата на гостувањето кај Болоња. Неговото нафрлување во 11. минута беше претворено во асистенција од Тиџани Рејндерс за Жиру, кој го отвори резултатот. Потоа самиот Пулишиќ со неверојатен удар од 20-ина метри зголеми на 0:2.
„Беше фантастичен почеток, секако. Многу сум возбуден што сум дел од овој тим“, изјави 24-годишниот Пулишиќ за DAZN.
„Двата рани гола ни помогнаа, бидејќи потоа беше тежок натпревар. За мене лично едноставно беше одличен почеток, убаво е кога ќе се даде гол, а незатресената мрежа и победата се секако секогаш убава работа“, додаде тој.
За Пулишиќ синоќа беше еден вид на повторно среќавање со поранешните соиграчи од Челси, Оливје Жиру, Фикајо Томори и Рубен Лофтус-Чик. Дали можеби нивното присуство во Милан го обеди и тој да се пресели на Чизмата?
„Само зборував со нив, со Оливје, имаме добро искуство заедно. Играв со Фикајо, играв со Рубен и постои поврзаност, како што видовте вечерва. Беше одлично повторно да се добие асистенција од Оли“, рече Пулишиќ. Жиру му ја намести топката кога го постигна голот за 2:0.
„Едноставно почувствував дека ова е перфектен чекор за мојата кариера, навистина се чувствувам добредојдено и сум возбуден што сум дел од овој клуб“.
Милан синоќа на „Ренато Дал'Ара“ во Болоња за прв пат го претстави напаѓачкото трио со Жиру, Пулишиќ и Рафа Леау.
„Многу е лесно да се игра покрај добри играчи! Оли секогаш се чини како да е на вистинското место за да постигнува голови, Рафа, се разбира, сите знаеме што може да направи, тој е многу опасен играч. Така да ова е навистина возбудлива група“, задоволно зборува Американецот со хрватски корени.
Ова беше првиот официјален натпревар за Милан по враќањето од турнејата низ САД. Пулишиќ сега едвај чека да ја почувствува атмосферата на „Џузепе Меаца“ стадионот.
„И тоа како. Навивачите сега во гости беа фантастични, па не можам да замислам како ќе биде дома. Можев да ја почувствувам атмосферата лани кога игравме против Милан, па сега ќе биде убаво да ги имам тие навивачи на моја страна“, рече.
Милан во наредното 2. коло на „Меаца“ го пречекува Торино. натпреварот е закажан за в сабота од 20:45 часот.
Кристијан Пулишиќ, кој вели дека неговото име и презиме е Кришчн Пулисик, најави дека Милан ќе се бори за Скудетото сезонава.
„Се разбира дека сакаме да се бориме да ја освоиме лигата, да се бориме за сите титули за кои сме во игра. Лично, сакам да продолжам да креирам и постигнувам голови, како направив сега, за да му помогнам на овој тим да освојува титули“.
Репрезентативецот на САД не сакаше да каже кои се фаворити за Скудетото. „Мислам дека е рано за да се каже“.
Во воведното коло од Серија А победија сите фаворити, освен Рома и Лацио. Интер со 2:0 ја совлада Монца, Јувентус ос 3:0 го преслуша Удинезе на гости, а Наполи со 3:1 и пресврт славеше кај новајлијата Фрозиноне. Рома на Жозе Мурињо разочара дома играјќи 2:2 со Салернитана, додека Лацио се лизна на гости кај Лече губејќи со 2:1.
