Во чест на советските војници кои загинаа при ослободувањето на Кореја од окупацијата на Империјалистичка Јапонија летото во 1945 година, Пјонгјанг во 1947 година подигна споменик висок 30 метри, познат како Споменик на ослободувањето.
Со декрет што го издаде рускиот претседател Владимир Путин, лидерот на Северна Кореја Ким Џонг Ун денеска беше одликуван со медал во сеќавање на 75-годишнината од победата во Големата патриотска војна.
Рускиот амбасадор во Демократска Народна Република Кореја, Александер Мацегора, му го предаде медалот на министерот за надворешни работи на ДНРК, Ли Сонг Гвон, во свечената сала Мансудае во Пјонгјанг.
Руската амбасада во Северна Кореја на својата официјална Facebook страница објави фотографии од настанот, како и декретот на Путин.
Во декретот стои дека севернокорејскиот лидер се одликува со медал за неговиот „огромен личен придонес кон продолжување на сеќавањето на советските граѓани кои загинале и биле погребани во Републиката, како и за грижата за зачувување на гробовите и спомен-обележјата“.
Споменикот на ослободувањето е познато обележје во Пјонгјанг, кренат во 1947 година во чест на војниците на Црвената армија кои загинаа во битките за ослободување на Кореја од јапонската окупација во последната фаза од Втората светска војна.
Првата посета на Ким Џонг Ун во Русија се случи на крајот на април, 2019 година, кога се сретна со Путин во Владивосток. Путин тогаш рече дека средбата била „доволно темелна“, а за Ким рече дека е „прилично отворен“ и интересен човек кој „има да каже многу значајни работи“.
Ни Путин, ни Ким не присуствуваа на денешната свеченост за врачување на медалот.
