На самитот на групата земји БРИКС во Јужна Африка, Владимир Путин преку видеоврска им се обрати на учесниците и порача дека овој блок треба да стане трговски блок што ќе го претставува „глобалното мнозинство“.
Во своите снимени коментари на средбата, Путин ги обвини западните санкции за нестабилноста на глобалните пазари за храна и други стоки и рече дека БРИКС во наредниот период ќе биде сила за правда во меѓународните односи.
„Соработуваме на принципите на еднаквост, взаемна поддршка и почитување меѓусебните интереси. Тоа е суштината на идниот стратегиски курс на нашето здружение, курс кој ги исполнува аспирациите на главниот дел од светската заедница, т.н. глобално мнозинство“, рече Путин.
Бразилскиот претседател Луис Инасиуо Лула да Силва во вторникот инсистираше на тоа дека целта на групата не е да се натпреварува со западните институции.
„Не сакаме да бидеме контрапункт на Г7, Г20 или САД. Ние само сакаме да се организираме“, смета да Лула да Силва.
Белата куќа, исто така, ја минимизираше веројатноста БРИКС да се претвори во моќен и кохезивен блок.
„Ова е многу разновидна збирка на земји... со различни мислења за критичните прашања“, рече на брифинг советникот за национална безбедност, Џејк Саливан.
Си не присуствуваше на првиот ден од самитот од необјаснети причини. Неговите забелешки во негово име ги даде кинескиот министер за трговија Ван Вентао. Во говорот што го одржа Вентао на самитот, Си инсистираше на тоа дека проширувањето на БРИКС нема за цел „да бара од земјите да заземат страна или да создадат конфронтација во блокот, туку да ја прошири архитектурата на мирот и развојот“, пишува британски The Guardian.
