Русија му возврати на Обединетото Кралство затоа што не беше поканета да присуствува на државниот погреб на кралицата Елизабета Втора во Лондон следната недела.
Стотици странски членови на кралски семејства и лидери се очекуваат во понеделник во Вестминстерската опатија на еден од најголемите дипломатски собири во последните децении и првиот државен погреб во Британија по шест децении.
Русија, чии војници ја нападнаа соседна Украина пред речиси седум месеци, и нејзиниот клучен сојузник Белорусија, се меѓу неколкуте нации исклучени од погребот.
Руското Министерство за надворешни работи го осуди Лондон за, како што го нарече, „длабоко неморално“ користење на национална трагедија за геополитички цели во услови на „најниското ниво“ во руско-британските односи од Студената војна наваму.
Во соопштението објавено на веб-страницта на Министерството за надворешни работи, се обвинува Британија дека „дава поделени изјави во насока на унапредување на нејзините опортунистички цели“.
Министерството се повика на сеќавањето на Втората светска војна, со пофалба за кралицата Елизабета Втора за служењето во британската армија, обвинувајќи ги „британските елити“ дека се на страната на она што Москва го нарекува украински „нацисти“.
Рускиот претседател Владимир Путин, кој испрати последен поздрав со многу пофалби за кралицата Елизабета Втора по веста за нејзината смрт на 8 септември, рече дека нема да присуствува на погребот на монархот.
Велика Британија им се придружи на своите западни сојузници во наметнувањето забрана за патување на Путин и неговите највисоки функционери во првите денови од руската инвазија на Украина.