Русија загуби голем дел од поддршката низ Европа откако се случи труењето на нивниот поранешен шпион, Сергеј Скрипал. Сега, во обид да ја врати поддршката и довербата, претседателот Владимир Путин вели дека и Русија се бори за обединета Европа.
Рускиот претседател утре треба да пристигне во Австрија, каде има закажано средба со претседателот Александер Ван дер Белен и канцеларот Себастијан Курц.
„Русија е заинтересирана за обединета Европа и не пробува да ја подели. Немаме намери да предизвикаме поделби во ЕУ, туку напротив, заинтересирани сме за напредок на Унијата бидејќи таа е нашиот најважен економски и трговски партнер“, вели Путин пред заминувањето за Австрија.
Од Кремљ беше соопштено дека Владимир Путин на 5 јуни ќе допатува во Австрија, а таму ќе се сретне со австрискиот државен врв.
Се очекува двете страни ќе дискутираат околу актуелните државни работи и руско- австриските односи во разни области, како и дека ќе разменат мислења за клучните глобални прашања.
Владимир Путин би требало да се сретне и со бизнисмени од двете земји поради дискусијата поврзана со взаемно корисната трговија и соработка, посебно во врска со испораката на гас.
