Рускиот претседател Владимир Путин првпат се обрати до јавноста откако прими вакцина против COVID-19.
Путин рече дека откако ќе му се формираат антитела, ќе го прошири опсегот на патувања и посети на разни установи, вклучително и културни.
„Ќе ги проширам посетите на разни објекти, вклучувајќи и културни објекти, библиотеки и така натаму. Денес, патем, планирам да ја посетам новата зграда на еден од театрите во Москва“, рече Путин на видеосостанокот со претставници на културата.
Денес е Денот на културните работници во Русија. Путин одржа онлајн настан со добитниците на наградата за млади културни работници и наградата од областа на литературата и уметноста за детски дела и за млади.
За потсетување, рускиот лидер во вторникот ја прими првата доза на двокомпонентна руска вакцина, а ќе биде ревакциниран за приближно две недели. Портпаролот на Кремљ, Дмитриј Песков, за новинарите изјави дека само Путин и неговиот лекар знаат која вакцина против коронавирусот ја примил рускиот претседател.
