Челичарница во Белгија по грешка им исплатила на дел од работниците огромен бонус, а сега ги бара парите назад.
На дел од работниците во челичарницата викендот им почнал феноменално – на сметките имале бонус од 30.000 евра.
Но, како што повеќето од нив се посомневале, станувало збор за грешка. Бонусот што требало да го добијат изнесувал само 100 евра, објавија белгиските медиуми.
Сепак, оние кои решиле да ја занемарат сомничавоста почнале да ги трошат парите – враќале долгови, а некои отишле да се коцкаат.
Меѓутоа, сега компанијата од Шарлероа си ги бара парите назад.
Каде отидоа парите?
Уште не е познато точно колку работници од вкупно 230 вработени во челичарницата го добиле непредвидениот бонус. Просечната плата во компанијата изнесува околу 1.600 евра месечно.
Поранешниот синдикален претставник Џузепе Пичуто смета дека се работи за мал број вработени.
„Бев шокиран кога видов колку пари имам на сметката“, изјави работник кој сакаше да остане анонимен.
„Ама веднаш ми беше јасно дека се работи за грешка и не ги допрев тие пари. Подигнав само онолку колку што знам дека ми е платата“, рече тој.
Тој вели дека сепак некои од неговите колеги потрошиле дел од парите.
„Знам дека некои отидоа во казино, некои отплатија долгови, а на дел им беа замрзнати сметките.“
Што вели законот?
Законот за труд е многу јасен: ако се подигнати по грешка пратени пари, мора да се вратат назад, вели адвокатот Етјен Пире.
„Дури и ако корисниците на сметките тврдат дека имаат право на тој бонус, парите мора да се вратат во целост“, вели тој.
Како знак на добра волја, компанијата може да одобри враќање на парите на одложено, додава Пире.