Фудбалерите на Рајо Ваљекано на домашен терен после голема борба го срушија актуелниот шампион Реал Мадрид со 3:2 во последниот натпревар од 13. коло во Ла Лига.
Со нашиот репрезентативен голман Столе Димитриевски помеѓу стативите, Рајо Ваљекано одлично го отвори натпреварот и поведе уште по само 5 минути игра преку одличниот контра напад во кој Фран Гарсија го проигра Санти Комесања, а овој ја затресе гостинската мрежа.
Сепак, во 37. минута Реал успеа да израмни. Марко Асенсио беше соборен во шестнаесетникот и судијата покажа на белата точка. Одговорноста ја презеде Лукла Модриќ и успешно го реализираше пеналот.
Само 4 минути подоцна Реал направи комплетен пресврт кога Асенсио нафрли од корнер, а Едер Милитау скокна највисоко и со глава погоди за 1:2.
Кога се чинеше дека на пауза ќе се замнине со водство на Реал, Иси Палакон му асистираше на Алваро Гарсија за 2:2.
Во вториот дел Рајо остана без својот тренер Андони Ираола на клупата кој беше исклучен и пратен во подтрибинскиот простор. Но, тоа не ги запре одличните домаќини да сонуваат за победа.
Се играше 65. минута кога Дани Карвахал играше со рака, а судијата Мунуера досуди пенал за Рајо. Одговорноста ја презеде Оскар Трехо кој упати очаен удар за лесна одбрана на Тибо Куртоа. Но, судијата оцени дека и Куртоа и играчите на Реал прерано почнале да се движат, па досуди повторување на пеналот. И овој пат Трехо не упати добар удар, но погоди носејќи водство за Рајо од 3:2.
До крајот Реал немаше многу шанси за израмнување освен онаа на Родриго во надополнувањето кога од два мертра пред гол успеа да промаши. Така, Рајо Ваљекано му го нанесе првиот овосезонски пораз на актуелниот шампион Реал Мадрид кој поради поразот го загуби првото емсто на табелата каде сега со 34 бодови е Барселона, додека Реал има 32.
Нашиот Димитриевски целиот натпревар го мина на голот на домаќините, а и покрај двата примени гола се радуваше на голема победа.
