Цените на нафтата се зголемија вчера на меѓународните пазари до 85 долари, поддржани од послабиот долар и проценките на инвеститорите дека американската централна банка можеби се приближува кон крајот на циклусот на зголемување на каматните стапки.
На лондонскиот пазар цената на барелот по пладне беше повисока за 65 центи од завчерашното затворање на трговијата и изнесуваше 84,83 долари. На американскиот пазар барелот се тргуваше по повисока цена од 92 центи, од 80,66 долари.
Цените вчера ги поддржа послабиот долар, кој ја зајакнува куповната моќ на купувачите со други валути, стимулирајќи ја побарувачката. Зелената банкнота ослабе поради очекувањата на инвеститорите дека Банката на федерални резерви се приближува кон крајот на циклусот на зголемување на каматните стапки.
За подобро да ги проценат изгледите за промена во насоката на американската монетарна политика, инвеститорите се свртуваат кон мартовскиот извештај за инфлацијата, кој ќе биде објавен денеска.
„Наскоро ќе биде појасно какви се краткорочните перспективи за нафтата. Оваа недела ќе дознаеме дали американската економија чекор по чекор ќе влезе во рецесија или ќе потоне како камен“, објаснува Едвард Моја од OANDA.