Во зоната на Чернобил, каде што се руските окупатори, е забележано зголемување на радијацијата, соопштија украинските власти.
„Поради окупацијата и присуството на непријателот, во моментов е невозможно да се утврдат причините за промената на радијационата позадина во зоната на исклучување“, наведува украинскиот нуклеарен регулатор.
„Податоците од автоматизираниот систем за следење на зрачењето во зоната на исклучување, достапни на интернет, покажуваат дека нивоата на гама зрачење (црвени точки) се надминати на значителен број набљудувани точки“, се вели во соопштението.
Нуклеарната централа во Чернобил е окупирана од руски сили, изјави во четвртокот советникот на кабинетот на украинскиот претседател Михаил Подољак, објави Reuters.
„Невозможно е да се каже дека нуклеарната централа во Чернобил е безбедна по целосно бесмислен руски напад“, рече тој.
Тој додаде дека ова е една од најсериозните закани во Европа денес.
Русија ќе распореди падобранска единица за заштита на Чернобил
Русија ќе распореди војници од падобранска единица кои ќе помогнат во заштита на затворената нуклеарна централа Чернобил во близина на главниот град на Украина, Киев, изјави денеска портпарол на руското Министерство за одбрана.
„Нивото на радијација во централата е нормално“, изјави портпаролот на брифинг.
Според него, руските трупи, кои вчера започнаа целосна воена операција во Украина, уништија 118 локации на украинската воена инфраструктура.
