Шпански новинар откри дека Фиорентина му го понудила голгетерот Душан Влаховиќ на Реал Мадрид, но „Кралевите“ експресно одбиле да го донесат во Мадрид.
За да не оствари трансфер во најомразениот ривал на Фиорентина, управата на клубот од Фиренца се обидела да го продаде Душан Влаховиќ дури и во големиот Реал. Но, оттаму стигнало разочарување бидејќи Шпанците веднаш ја одбиле понудата.
Ова го откри новинарот Хесус Гаљего за време на гостувањето во подкастот „El Larguero“.
„Од Фиорентина се јавија во Реал и им рекоа: 'Дајте понуда, го продаваме, има понуда од Јуве'. Затоа што Фиорентина знаеја дека ако Реал се вклучеше во таа битка, ќе ја надминеа понудата на Јуве и немаше да имаат проблем ниту со платата на играчот. На Мадрид им се допаѓаше играчот, се подзамислија, но Мадрид одамна го сака Мбапе и затоа ја одбија понудата“.
Според гол-формата 22-годишниот Србин би бил идеално засилување за Реал, но таму веќе некое време се цврсто насочени кон Килјан Мбапе од ПСЖ.
На крајот од зимскиот преоден рок Влаховиќ потпиша за Јувентус за рекордни 80 милиони евра.
