Неовластено беа објавени дизајнот и боите на дресовите на Реал за следната сезона.
Реал ги изненади навивачите со тоа што покрај првиот бел, како втор дрес ќе има и портокалов, а третиот комплет ќе биде кафеав.
Marca истакнува дека станува збор за револуционерна промена: „По неколку години со сина, црна и виолетова, Реал се одлучи за револуција, и тоа многу ризична. Вториот комплет ќе биде портокалов, но третиот е кафеав!“
Секако, за што сведочи и фотографијата што го придружува текстот, Реал веќе играше во портокалово. Тоа беше пред 10 години, во сезоната кога ја освои Децима, десетта европска шампионска титула. Во портокалови дресови оствари незаборавна победа од 6:1 против Шалке.
Но, Реал никогаш не играл во кафеави дресови.
„Последниве години клубот носеше чудни бои за него: црвена, розова, зелена и портокалова како најризични, но сега отиде чекор понатаму со кафената боја на дресот, која е многу ретка во фудбалот. Моментално само Сент Поли имаат дресови во таа боја. Претходно ја користеше Барселона со Роналдињо во 2003/04, а во последниве години Арсенал и ПСЖ“, пишува Marca.
Истиот извор забележува дека Реал се одлучил за голема промена на бојата за сезоната кога се очекува рекордна продажба на дресови: „Реал од летото ќе има две суперѕвезди во својот состав, чии дресови ќе предизвикаат бум во продажбата. Дресот на Реал беше бестселер во светот со години, но прогнозите се дека неговата продажба ќе се зголеми многукратно со доаѓањето на Килјан Мбапе, додека дресот на Џуд Белингем е веќе најпродаван во Реал“.
На крајот Marca пишува: „Дознавме како ќе изгледа новата верзија на најскапиот дрес на светот. Реал само од три спонзори на дресот: Adidas, Fly Emirates и HP заработува 250 милиони евра годишно. На тоа треба да се додадат приходите од физичка и онлајн продажба на дресови.“