Хосе Антонио Рејес Лопес, 16-годишниот син на починатиот поранешен играч на шпанската репрезентација, го потпиша својот прв договор со Реал Мадрид. Тој пред само неколку дена го прослави својот 16-ти роденден.
Синот на Хосе Антонио Рејес пристигна во фудбалската школа на Реал како 11-годишник, неколку месеци по трагичната сообраќајна несреќа во која загина неговиот татко.
Фудбалскиот развој на младиот офанзивец го воодушеви раководството на клубот, кое му го даде првиот професионален договор.
Хосе Антонио Рејес имаше блескава кариера која ја изгради играјќи за Севиља, со која трипати ја освојуваше Лига Европа, со Арсенал беше дел од непоразениот шампионски тим во сезоната 2003/2004, со Реал Мадрид во сезоната 2006/2007 стана шампион на Шпанија, а со Атлетико двапати ја освои титулата во Лига Европа… Играше уште и за Бенфика, Еспањол, Кордоба, Шинџиан Тианшан Шуебао и Екстремадура. За Шпанија одигра 21 натпревар и постигна 4 голови, а беше дел од составот на Мундијалот 2006.
Загина на 1 јуни 2019 година во сообраќајна несреќа. Првите информации говореа дека до несреќата дошло додека се возел со 220 км/ч, подоцна полицијата констатирала дека брзината на автомобилот била помеѓу 110 и 130 км/ч и дека до несреќата дошло поради дефект на воланот или тркалото.
