Сите блока во РЕК Битола се во прекин, односно од денеска во овој рударско-енергетски комбинат воопшто не се произведува струја.
Пожарот кој во петокот вечерта избувна во Блок 3 направил сериозни оштетувања на трансформаторот, поради што запрено е производството на струја во овој блок, како и во Блок 2.
Од утринава во дефект е и Блок 1 поради пукната цевка, што значи дека РЕК Битола повеќе не произведува струја. Се работи на отстранување на дефектот со надеж дека тоа ќе се случи денеска, па Блок 1 ќе одново ќе почне да произведува електрична енергија.
Со оглед на тоа што во моментов ниту еден блок не произведува струја во РЕК Битола, тоа значи дека потребните количини на електрична енергија се влечат од меѓународната мрежа за што државава веќе има добиено неколку опомени од Европската енергетска мрежа.
Комисија предводена од министерот за економија Крешник Бектеши утре ќе побара Владата да прогласи кризна состојба поради енергетската криза, но без рестрикции.
Во декември би требало со работа да стартуваат ТЕЦ Осломеј и ТЕЦ Неготино. Веќе некое време во функција се ставени хидроелектраните Маврово, Црн Дрим, Треска и Тиквеш, гасната елекрана Енергетика-Скопје, како и ветерниот парк Богданци.
РЕК Битола е најголемата подружница во составот на АД Електрани на Македонија која овозможува над 70% учество на комбинатот во вкупното производство на електрична енергија во електроенергетскиот систем.
