Прелиминарните резултати од клиничко тестирање на нова протеинска терапија за COVID-19 покажуваат драстично намалување на бројот на пациенти на кои им е потребна интензивна нега, соопшти британската компанија која ја разви терапијата.
Биотехнолошката компанија Synairgen од Саутхемптон во терапијата користи протеин наречен интерферон бета, кој телото го произведува кога има вирусна инфекција.
Протеинот се внесува со вдишување директно во белите дробови на пациентите со коронавирус, со помош на небулизатор, и очекувањата се дека ќе поттикне имунолошка реакција.
Првичните резултати покажуваат дека терапијата ја намалува веројатноста пациентот со COVID-19 кој е хоспитализиран да развие потешка форма на болеста и да му е потребна интензивна нега и респираторна поддршка, и тоа за 79%.
Пациентите кои ја примале терапијата исто така имале за два-три пати поголеми шанси да закрепнат до степен каде болеста не им ги попречувала секојдневните активности, тврдат од Synairgen.
Клиничкото испитување на терапијата исто така покажа дека има „многу значајно“ намалување на губењето здив кај пациентите кои ја примале терапијата.
Исто така, просечното време кое пациентите го поминувале во болница било намалено за една третина за оние кои ја примале терапијата, во просек од 9 до 6 дена.
Во тестирањето биле вклучени 101 доброволец кои добивале терапија во девет британски ковид болници.
На половина од испитаниците им била давана протеинската терапија, а другата половина добиле плацебо – неактивна супстанца.
Берзанските правила налагаат дека компанијата Synairgen е обврзана да ги објави прелиминарните резултати.
Резултатите уште не се објавени во стручно списание и не се достапни целосните податоци, објави BBC напоменувајќи дека нема независна потврда за ефикасноста на терапијата.
Повеќе за истражувањето прочитајте ТУКА.
